| Sera napulitana testo
Sera napulitana!
Prufumo d'erba 'e mare e ragge 'e luna,
mmiscate cu 'e mutive d''e ccanzone...
Cantano 'e 'nnammurate a Margellina...
Sera napulitana!
Po' Napule s'addorme chianu chiano,
pe' se sunná ch'è ancora na riggina...
Io sulo sulo, ll'uocchie chine 'e te,
mme pare comme fosse fatto a vino.
Sbattuto 'int'a na rezza, 'mmiez'ô mare,
dint'a na rezza fatta cu sti mmane,
io veco chistu core
cchiù 'nfunno...
'nfunn'ô mare...
Sera napulitana!
...Io veco chistu core
cchiù 'nfunno...
'nfunn' ô mare...
Sera napulitana!
De Mura - Gagliardi
o ciucciariello testo
'Ncopp'a na strada janca e sulagna,
'mmiez'a ll'addore e a ll'aria 'e campagna,
na carretta piccerella,
chianu chiano, se ne va...
Nun s'affatica stu ciucciariello,
nun tene pressa...ch''a tene a fá?
E sta luntano stu paisiello
addó' nisciuno ce ha da aspettá...
E tira, tira, tira, oje ciucciariello...
'sta carrettella, tírala tu!
e sona, sona, sona, 'o campaniello...
ma chi aspettava nun ce sta cchiù...
Na femmena busciarda mm'ha lassato:
luntano da 'a campagna se n'è ghiuta...
E tira, tira, tira, oje ciucciariello...
pe' n'ata strada pòrtame tu!...
II
Oje ciucciariello buono e aggarbato,
tu ca nc'hê visto sempe abbracciate...
na prumessa 'e matrimonio,
a sentiste pure tu...
Essa diceva: "Si' 'a vita mia
e a primmavera c'îmm''a spusá..."
Nun era overo: fuje na buscía...
se n'è partuta...chisà addó' sta?!...
E tira, tira, tira, oje ciucciariello...
......................................................
Finalino:
'Ncopp'a na strada janca e sulagna,
'mmiez'a ll'addore e a ll'aria 'e campagna...
na carretta piccerella,
chianu chiano, se ne va...
'o bar 'e ll'universita' teso
Dint'a stu bar 'e ll'Universitá,
tu parle 'e te...
io parlo 'e me...
parlammo 'e nuje...
Quanta buscíe,
quanta felicitá
ca véne e se ne va...
'Nnammurate comm'a te,
una sola ce ne sta...
se chiamma giuventù,
comme te chiamme tu...
Dint'a stu bar 'e ll'Universitá,
trovo 'e vint'anne 'e tantu tiempo fa...
Comm'è doce stu ccafè,
ca mme piglio 'nziem'a te...
Comm'è amara 'a veritá:
Sceta 'e suonne...e se ne va...
Dint'a stu bar 'e ll'Universitá,
trovo 'e vint'anne 'e tantu tiempo fa...
Comm'è doce stu ccafè,
ca mme piglio 'nziem'a te...
comm'è amara 'a veritá:
Sceta 'e suonne...e se ne va...
'Nnammurate comm'a te
una sola ce ne sta:
se chiamma giuventù...
ma i' nun 'a trovo cchiù...
Annona - Di Domenico
'o meglio amico testo
Ll'amico mio si' tu. Comme te pare?
'O tengo n'ato amico meglio 'e te?
'O stesso banco â primma elementare...
nce vulevamo bene comm'a che...
Tu sempe 'nzisto, io sempe cchiù abbunato,
mme suppurtavo 'a te cchiù 'e na pazzía...
Nun te ricuorde? Mme chiammave frato
ma t'arrubbave 'a marennèlla mia...
Che fa?
Che fa?
Só' cose ca succedono...
Cu chi t''a vuó' piglia?
Dámmoce 'a mano:
'O bbi' ca só' semp'io...
e tu si' sempe 'o meglio amico mio!
II
'A zia nun te vuleva dint''a casa,
ma i' cumbattevo pe' te fá vení...
"Oje ninno mio, chillo t'abbraccia e vasa,
ma tene ll'uocchie 'e chi te vò' tradí..."
Quanno, cinch'anne fa, stive malato,
vicin'ô lietto tujo stevo sul'io,
ma, dint''a freve, miezo frasturnato,
te stupetiaste 'o portafoglio mio...
Che fa?
............
III
Ll'amico mio si' tu...guárdame 'nfaccia...
Guárdame buono 'nfaccia e nun tremmá...
Ancora mme vuó' stregnere 'int''e bbraccia?
Tiene ancora 'o curaggio 'e mme vasá?
Vattenne marijuolo! 'O ppuorte scritto
dint'a chist'uocchie ca si' scellarato...
I', pe' vint'anne, mme só' stato zitto,
i', pe' vint'anne, t'aggio perdunato!
Che fa?
Che fa?
'Stavota t'aggio cuóveto
e nun mme puó' arrubbá...
Primma te stenno 'nterra 'mmiez'â via...
e po' t'arruobbe 'a 'nnammurata mia!
Bovio - Albano
|
