| ‘o pranzo ‘e Pasqua
A tavola nun è tradizione
si nun faccio ‘a benedizione…
e doppo fatto ‘o segno d’ ‘a Croce
tutte quante ‘nzieme a una voce
a nostro Signore ringraziammo
po’ ognuno ‘o posto sujo e zitto
s’accummencia ca fellata d’ ‘o sottoscritto,
e tutte quanto nuje brindammo….
ll’ove sode, ‘o capucuollo ..j’ che festa
c’ ‘a ricotta salata.. tutta appriparata
dint’a na guantiera tutta argentata…
e po la mia mogliera porta ’ a menesta,..
fatta c’ ‘a carne ‘o ‘a gallina paesana…
po’ e ccarcioffole, po’ doppo arrepusate
ncopp’a tavola è pronto ‘o tortano e ‘o vino
ll’acqua minerale, ‘a coca cola, ‘o chinotto,
‘a cassosa, e tutto a soddisfazione,
po se metteno ‘e paste dint’a guantiera,
po’ ce stà ‘a colomba pasquale, ‘a pastiera…
e po’ l’amaro do’ cumpagno mio Pachialone
‘ o stock 84, ‘o limoncello, tanti liquore
e all’urdemo ‘o cafè…ah, m’ero scurdato
‘a cosa cchiu’ bella ll’uovo ‘e ciucculata,,
ca surpresa ‘e diciotto karati tutta d’oro…
ma quanto m’hè custata sta magnata…
mannaggia ‘a mesata mia se n’è vulata!!
Ah, ‘a supresa pesa 50 grammi e tutta d’oro?
Va be’ dimane gia’ stà addo ‘mpignatore!!
Ciro Borrelli in arte Massenzio Caravita
'A SORPRESA
Te sto' fettianno 'a quanno sì arrivato,
cu 'stu vestito a ffiore e 'a nocca 'nganna,
te sì ppiazzato dint'ô meglio posto
addò è sicuro ca sarraje guardato.
E i' te guardo, mentre passo e spasso,
nun te pozzo levà chist' uocchie 'a cuollo,
'a tentazione è fforte e mme turmenta,
'o desiderio cresce e nun me lassa.
I' già te veco annuro 'int'a 'sti mmane,
te sbatto forte primm'’e te fà mio,
vurria sapè che t'annascunne dinto
'e tutto chesto po che mme rummane?
Spero ca nun me daje 'na delusione
comm' hanno fatto ll'ate primm’'e te:
tanti pprumesse, tanti bbelli pparole,
ma po nun m'hanno dato nient'’e buono.
Certo però, stavota nun ce casco,
i' cerco 'e nun me fà tropp' illusione.
Stavota ovèro nun m'aspetto niente.
a ccunte fatte sì ssulo... n'uovo 'e Pasca!
Gianna Caiazzo
STORIA DELLA PASTIERA
A Napule regnava Ferdinando
ca passava e' jurnate zompettiando;
mentr' invece a' mugliera, 'Onna Teresa,
steva sempe arraggiata c’ ‘a faccia appesa
o' musso luongo, nun redeva maje,
comm'avesse passate tanta guaje.
Nù bellu juorno Amelia, a' cammeriera
le dicette: "Maestà, chest'è ‘a Pastiera.
Piace ‘e ffemmene, all'uommene e ‘e ccriature:
uova, ricotta, grano, e acqua de’ sciure,
'mpastata insieme ‘o zucchero e ‘a farina
‘a può purtà nnanz o'Rre: e pur' a Rigina".
Maria Teresa facett a' faccia brutta:
mastecanno, diceva: "E ‘oParaviso!"
e le scappava pure o' pizz'a riso.
Allora o' Rre dicette: "E che marina!
Pe fa ridere a te, ce vò a Pastiera?
Moglie mia, viena ccà, damme n'abbraccio!
Chistu dolce te piace eh? E mò c' ‘o saccio
ordino al cuoco che a partir d'adesso,
stà pastiera la faccia un pò più spesso.
Nun solo a Pasca, che altrimenti è un danno;
pe te fà ridere ha dda passà n'at' anno!"
ANONIMO
'O CIRENEO
Vinte secule fà già cundannato,
Gesù senza tene' cchiù n'ombra 'e sciato
s'avviava a 'o calvario rassignato
pe' turna' n'ata vota 'mbraccia 'o pate.
E chi alluccava,chi sbatteva 'e mmane,
dicenno: "A morte 'o nazzareno, a mmorte!"
Trattavano a Gesù peggio 'e nu cane
mentre Maria chiagneva pe' sta sciorta.
'Mpruvvisamente n'ommo analfabeta
nu camapgnuolo bello,gruosso e forte,
fui cummannato 'e accunpagna' 'o prufeta
chi dice pe' sfutto' chi pe' cunforto.
Simone se chiammava e purtaie 'a Croce,
pesante e grossa 'e ligno staggiunato,
miez''a na folla 'e popolo feroce
stu cireneo pareva 'e di': Ch'è stato?
Pecchè propri'io si ce stà tanta ggente
aggia purta' sta croce e fa' 'o facchino?
Chesto sicuro le venette a mmente
strascennannese stanco p''o cammino.
Sta storia 'mpara ca nisciuno a 'o munno
se fide 'e suppurta' 'a Croce 'e n'ato
pirciò st'umanità va sempe 'nfunno
sempe cchiù sperza e sempe cchiù dannata.
|
