'o don Nicola,, Raffaele Viviani

O Don Nicola

Grazie pè l'accuglienza:
che dopo una lunga assenza
all'apparire della mia presenza,
v'avutate 'e renza
e mi mostrate questa circonferenza

Vuje mo vedennome accussì arremediato
ve sarrate immaginato
ca 'a miseria m'ha pigliato.
E nun ve site sbagliato:
ce avite 'nduvinato.

Io stevo 'Avezzano 'mpiegato
e d' 'o terremoto sò nu scampato:
ma 'e sorde che hanno mannato
pe soccorrere 'e danneggiate
e p' 'e case sgarrupate
nun l'avimmo viste manco pittate;
pecchè chille d' 'o Cumitato
se l'hanno passate l'uno cu ll'ato;
e 'e sorde se songo assuttigliate,
e mano mano songo squagliate.

Sicchè 'e signure se l'hanno cuntate,
'e signure se l'hanno arunate,
'e signre se l'hanno magnate,

Pè nun fà ascì 'o grasso a fora 'o pignato.
E io, povero sfortunato,
songo restato cumm'a ll'ate:
curnuto e mazziato.

E natu regalo ci ha complimentato
'a cumeta ch'è passata
Nu mese primma ca fosse arrivata
tutt' 'a gente appaurata
passavano 'e nuttate
'miezz' 'a via scetate;
e cu ' llampe e 'e cannele appicciate
addenucchiate e scappellate
priavano 'a Mamma Addulurata
cu avemmarie e gloria pate
ca ll'avesse scanzate
d' 'e ffà murì sprufunnate.

Ma 'o juorno destinato
ca cu na forte ventecata
'a cumete s'è rivoltata
e ha pigliata na via pe n'ata,
o popolo ha suspirato
p' 'o pericolo evitato.

Ma quanno 'a calma è ritornata
se songo scummugliate
tutt' 'e zelle d' e' disperate.
'O patrone 'e casa s'è piantato
fora 'a porta 'mpalato
e all'inquilini così ha parlato:
Come avrete bene osservato
'a cumeta è trapassata
e 'a coda nun ce ha 'ntuppato.
'O commercio s'è arripigliato:
e io avanzo tre mesate
e voglio essere pavato.
Ih che Ddio 'e guaio ch'aggiu passato.

E allora accussì affamato
aggio penzato : faccio 'o surdato,
ca si moro, moro pò stato,
ma sempe doppo ch'aggiu magnato.

E mo ca Tripule avimmo pigliato
pè via che 'e curazzate
allazzavano cannunate
cunfessate e cumunicate
e 'e Turche e ll'Arabe se sò ammusciate
p' 'e batoste che hanno azzeccate;
e ca ll'Italia s'è risvegliata
menanno mazzate 'a cecata:
'o guverno ha richiamato
a n'atu pizzico 'e surdate
e 'e mantene sparpugliate
pè tutte 'e forte che ha conquistato.

Io pure me songo presentato
pè ghì a cumbattere insieme 'a ll'ate:
e tanto che aggio scucciato
ca 'a dimanda è stata accettata;
e io tutto priato
sò passato dint' 'a cammarata
e llà me songo spugliato
'mpresenza a tutta l'armata.

Doppo n'ora che aggio aspettato
e ca m'ero seccato
'e stà annuro llà 'mpalato,
'o tenente m'ha chiammato
e io me songo avanzato
c' 'a speranza d'essere pigliato
pe' me ffà quatto turche a' 'nzalata
e na ventina d'arabe arrecanate.
Ma lo tenente m'ha guardato
nu pucurillo sconcertato
e non appena m'ha visitato
è rimasto spoetizzato;
e ha ditto vicino a n'ato:
Si tenessemo sti surdate
avessemo 'o pato pato d' 'e mazzate!
Pò 'a parta mia s'è avutato
e, dannome na vuttata
ca pè poco 'nterra nun me ha menato,
ha ditto: E' meglio ca ve ne jate.
Vuie nun servite pe l'armata:
nun putite ffa manco na marcia sfurzata
pecchè tenite tutt' 'e nierve ammusciate.

Io me songo mortificato,
ma pò me songo arripigliato:
'e piede 'nterra aggio 'ncasato
e, mustrannelo 'o braccio chiato,
aggio ditto: Si nun me schifate
ccà 'o muscolo è sviluppato.
Attentate! Ma scusate!
c' 'o vulite cchlù 'ntustato?
Isso allora ha replicato:
Mo ve faccio na cauciata
ca ve truvate sotto 'o palazza assettato,
c' 'o funniello d' 'o cazone sfunnato.
Io me sò visto scunfidato
e aggio penzato terrorizzato:
Ccà pure 'a morte m'ha schifato!

E mò ca 'a guerra è passata
pozzo parlà 'e chi ha speculato,
ha mangiato e s'è accunciato
a spese 'e chillo ch'ò trapassato
p' 'a grandezza dello stato.

Chi teneva sempe appicciate
'e cannale 'a Mmaculata,
pecchè 'a guerra fosse durata
per lo meno quacche ata annata,
quanno 'a pace s'è firmata
ha avuto 'ncapa na mazzata.
Accumincianno d' 'o spustato,
'o surdata l'ha sullevato.
Si è p' 'o fronte, nun c'è stato
pecchè, a furia 'e fà nuttate,
'o litro acito 'ncopp' 'a 'nzalata,
'o cafè che ha magliecato,
'e popolare ca s'ha fumato,
'o zurfo che ha rispirato,
e tutt' 'e purghe ca s'ha pigliato,
l'hanno inabile dichiarato
e l'hanno miso 'e guardia a' ritirata.
Pirciò 'a pelle nun l'ha arresecata.
Ma 'a famiglia è stata suvvenziunata;
'e gavette se l'ha pigliate,
'e pagnotte se l'ha magnate,
'e cinquine se l'ha purtate,
'o paro 'e scarpe l'ha arrevutato;
e 'a mantella ca l'hanno data
'a mugliera l'ha taccariata
e ha vestuto'e guagliune 'a surdato.
Però mò è fernuta tutta 'a scialata
nun solo pè isso, ma pure pè ll'ate.
Tutt' 'a robba ca steva astipata
mano mano l'hanno cacciata,
ma s'era già nfracetata.
'O cummirciante s'è sparato,
'o furnisore se l'è squagliata
e quacche mugliera se n'è scappata
pecchè, turnanno 'o marito 'a surdato,
nun l'avesse truvata gunfiata.

Intanto a Roma cchiu 'e nu tizio
hanno voluto fà na perizia
p'assudà ca 'int'a tutt' 'e servizie
ce steva 'a ddiecia d' 'a spurcizia.
Ma 'e furnisure, fatto 'o cumizio,
dicettero: "A faccia d' 'a giustizia!
Quanno 'e sorde stanno in esercizio
e tuttequanne fanno caccià 'e vizie.
Piglia a Caio, afferra a Tizio,
quacche arresto fuje fittizio.
Mo tra mariuoli e 'a giustizia
ce sta tale n'amicizia
ca a parlà 'e nu giudizio
pare quase n'ingiustizia.

A me m'ha pure felicitato
'a lotteria nazziunale passata.
M'arricordo ca m'aggio 'mpignato
tutt' 'o curredo ca m'era restato:
na mutanda cu 'o funniello sfunnato,
duie pare 'e cazettielle scagnate
cu 'e tallune e 'e puntette arrepezzate,
e na cammisa culurata
ca pè ghì sempre a' culata
s'era troppo arricamata.

E facennone una mappata, un'avutata,
'o Banco 'e Napule 'aggio purtata.
Ma 'o 'mpignatore quanno l'ha schiata,
primma 'e ddete s'ha pulizzato
e pò ha ditto spacienziato:
Vuje 'e rrigiole nun 'e lavate?
Però 'a liretta m'ha cunzignata
e op sò sciso cuntento e aggarbato:
na cartella m'aggio accattata
e 'a lampa 'nnanze ce aggio appicciata.

E quanno 'a tombola s'è tirata
'o melione s'è avviato
verso 'o popolo cha ha jucato;
ma vedennose perseguitato,
e circundato 'a tutt' 'e late,
da 'e componente d' 'o Cumitato,
s'è fermato a mità strata
e ha penzato appaurato:
Mo me faccio fà na girata.
E misteriosamente s'è arritirato
e dint' 'o Banco s'è arrebbazzato.
E io ca m'ero lusingato
me trovo 'a biancheria 'mpignata.
E 'o popolo cha ha jucato,
si 'o biglietto s'ha stipato,
per lo meno l'è restato
nu piezzo 'e carta culurata
ca sempe sarrà autilizzata.

Signure belle, comme avite capito,
i' esco p' 'a fraveca 'e ll'appetito.
Jammo, nu sordo nun ve scumpiglia:
simmo quinnece 'e famiglia.
Tengo solo sette figlie
ca se magnano 'a muniglia
e s'alliccano 'a ratiglia.
Io m'abbrocco e m'assuttiglio,
e muglierema Cunziglia
uno lassa, n'ato piglia;
e, ogne tanto, mme fa nu figlio
ca poco e niente m'arrassumiglia.