| POESIE NAPOLETANE SUGLI ZAMPOGNARI
'E ZAMPUGNARE(Capaldo - Gambardella)
Mo ch'è fernuta ll'uva d''a vennegna, e s'è cuperta 'e neve la muntagna... pigliámmoce, cumpare li zzampogne e ghiammo a lu pagghiese d''a cuccagna!
Mé', cumpá', jammo já... Mé', cumpá', jammo já...
Cu poche sorde ca facimmo 'e spese, nuje ce purtammo 'e llire a lu pagghiese.
Facenno: rullèro... vestute 'a pasture, facimmo messere na meza cittá!
Dicimmo a lu ssunare la zampogna: "'Ncampagna nun ce manca maje la legna, nun manca 'o puorco pe' ce fá la 'nzogna... e 'o fusticiello 'e vino d''a vennegna!..."
Mé', cumpá', jammo já... mé' cumpá', jammo já...
E si nce manca sulo 'o susamiello, nce ll'abbuscammo cu lu cucchiariello...
Facenno: rullèro... ..............................
A Napule, cumpá', si se guadagna, pecché se fanno diebbete e se 'mpigna? A lu pagghiese nun ce stanno fogne... Li tterre sóngo chiene pe' fá vigne...
Si cumpá', vuó' pruvá... si cumpá', vuó' pruvá...
Vatténne cu mugghièreta nu mese... ca senza cioce tuorne a lu pagghiese!
Facenno: rullèro...
E’ ARRIVATO ‘O ZAMPUGNARE Aggia lasciata ‘a poco ‘a casa Amalfi, addò vaghe pè m’arrupusà Nà casarella mièze ‘o verde da montagna appesa comme è panne stise ‘o sole Attùorno, albere è limone é piante è jure è giusummine
Foro ‘o balcone sotto ‘a nù crillagge…. appise ‘o muro Tre mazz’é sovère ,pummarulelle ‘o piennelo è nà cullane e perla d’uva passa Nà felere è mellone verde e gialle ..pronte pè magnà Nu’ po’ manca n’a vista ‘a mare….sto sempe a mò guardà Stu mare ca nunn sbatte! Nunn sta mai n’cazzate. Purismo venè ‘a Amalfi arrèpusà
Comme è furastiere c’arrivane ‘a sta città. Venen’a luntane ‘e pure e vierno se vonne abbagnà. Int’a chest’acqua verde cristallina pura…‘e culure da montagna ‘O sole se specchia, è cu ‘o tramonto… russo ‘o fa addeventà
Me sò alluntanate pè poco, pè turnà a Napule che è a mamma è sta città Nisciune ‘o sape ché… nunn’è Napulitana ,ma è nà parente stretta , è Capri Surriento é Ischia è vere figlie dà città che è de mille culure, è migliaie è tradizioni ,ca sule cà sè ponne truvà
E nove stammatina….Nù suone ‘e zampogne ‘O zampognare è venute ‘a sunà ‘a novena, nunn’è pè Natale E’ venute ‘a purtà a Cucchiarella e Lignamme nù pigne pè continuà. Cià date n’acconto, a fatta ‘a novena ‘a Maronna. A mamma è Gesù Cristo
Che bella sorpresa che è stata ‘a nuvena, è nù signale ca! Nat’anne è passato
Mò stev’Amalfi…Era ancora stagione è mò, è gia Natale Comme corre o tiempo di Michele Onesti
'E ZAMPUGNARE 'E zampugnare scennene
'a na muntagna fredda 'e
china 'e neve, 'e venene into
'e pajse, sunanno na nuvena
e tanto tiempo ffa! 'e sunanno,
risunanno,'a meludia cammina,
ppè 'o verde 'e chisto mare , 'e va
ppè dinto all'onna, ca sbatte ncoppo 'e scoglie!
'e saglie ppè sto cielo avvelllutato, ca è sempe
chino 'e stelle! "Oje zampugnà! ma 'a vide 'a
cchiù lucente? Chella nc'è porta 'nutizia
'e cchi ,è nato ppè d'à ammore, 'e ppò
pè chesto more! " 'e quando ppò fernesce
'a festa, tu ,tutto suddisfatte, saglie
ncoppa 'e muntagne ,addò ritruove 'a pace
'e tutta la famiglia, c'aspetta 'o capo
'e casa, ca porta giuvamente 'e chella
cammenata, ca pè nu mese è stata, frutto
'e na cosa bella, ll'anniversario 'e nascita
ddò bambeniello cchiù doce dd'ò criate,
cca ha ddato 'o core, pure 'a cchi è
scustumato, 'e ppò, ppè nc'è levà 'a nuje
tutte 'e peccati, avuta ffa na vita, na vita
'e ricercato! 'e nuje nc'è 'o ricurdamme
sultanto ppè ste juorne? LL'avessema
penzà, pure ppè tutto ll'anno PUBBLICATO DA MANÙ
Nuttata 'e Natale (Salvatore Di Giacomo) (1898)
Dint'a na grotta scura dormeno 'e zampugnare: dormeno, appese a 'e mura, e ronferno, 'e zampogne quase abbuffate ancora) a ll' úrdema nuvena; e, ghianca, accumparesce e saglie ncielo, dint' 'a chiara nuttata, a luna chiena.
Dormeno: a mezanotte cchíù de n' ora ce manca; e se sparano botte, s' appícceno bengala, e se canta e se sona pe tutto 'o vicenato... Ma 'o Bammeniello nun è nato ancora, e nun s' è apierto ancora 'o Viscuvato.
Fora, doppo magnato, esce nfucata 'a gente: ccà d' 'o viento gelato, p' 'e fierre d' 'a cancella, trase 'a furia ogne tanto... E c' 'o viento, e c' 'o friddo, ncopp' 'a paglia pugnente, a ppare a ppare, dormeno, stracque e strutte, 'e zampugnare…
Torna Natale (Bovio 1928)
... Torna Natale... Ggiesù Bammino torna n'ata vota bene facenno a chi 'o facette male... comm'a na vota...
E cu nu panariello chino 'e noce na vecchia saglie 'e ggrade d' 'o spitale... "Némmero ventequatto... Santacroce... ca tenga 'na resibbola facciale"...
(E "Ileru Ilero" m' 'a so' sunnata c' 'o scíalletto rosa, ca me diceva, T'aggia di' 'na cosa... Statte cchiù allero!)
E 'o carcerato 'areto a 'na cancella guarda luntano, senza guardà niente... So' nove juorne ca le vene a mente nu vascio scuro cu 'na vícchiatella.
(E "Ileru Ilero"... sarrà passata na staggiona sana, ma c aggia fa' si nun me pare overo ca sta luntana?)
-'0 zampugnaro, sunanno 'a nuvena, nant' 'a Madonna 'Aiuto s'è 'ncantato ... "Lleru Ilero - ... Madò, tengo 'na pena Lleru Ilero - Madò, so' 'nnamurato! "
(E Ammore, Ammore, nce avevo miso ll'anema e 'o penziero; avevo ditto: Si 'stu suonno è overo, torna 'o vapore ... )
Ninno e nennella metteno 'o Bammino dint' 'o Presepio, sott' 'a grutticella... Nenna nce allumma 'nnante nu cerino, ninno, redenno, sona 'a ciaramella...
(E dint' 'o scuro cchiù fforte chella sera me vasaie... Dimane tuorne? - Torno. - E giura. - Giuro... Ma nun turnaie).
Torna Natale... Ggiesù BammIno torna n'ata vota, bene facenno a chi 'o facette male comm'a na vota!
|