|
|
| O sie’ Biasiello steva disperato,
ma disperato all’ultimo buon gusto!
Spisso manco magnava cucenato...
Che buò accattà cchiù carne e felle arrusto!
Ma intanto steva sempe allegrulillo:
pareva ca tenesse ‘na speranza...
Sperava, e già, comm’a nu piccerillo...
E sulo ‘e chesto s’abbuffava ‘a panza...
Quanno se ritirava, passo passo,
‘a sera, se cuccava e s’addurmeva:
doppo nu poco era nu contrabbasso...
‘O runfo ‘a fora ‘o vascio se senteva...
Durmeva a sciala core, e chesto è overo,
cumm’uno che sta sazio. E sazio ‘e che?
Sazio? gnernò: ma cuieto ‘e penziero.
Stanco? che saccio? che nne può sapé?
Cert’è ca repusava ‘na bellezza,
e se scetava sempe ‘e nu culore:
Pareva ‘o pesce asciuto ‘a dint’ ‘a rezza:
maie ‘na iurnata sola ‘e malumore.
E che vulite fa? so’ tre semmane
ch’ha pigliato nu terno, na summetta;
e ll’hanno dato ncuollo tutte quante:
nun ave a cchi dà cunto e a chi dà retta...
Chi avanza e vo’ cità; chi ha minacciato...
Hanno mmustato tutte quante ‘e diente...
Chi ll’ha fatto credenza, chi ha mprestato;
e songo asciute mo tutt’ ‘e pariente...
‘O sie’ Biasiello pare scemunito...
A che servano ‘e llire e ‘a panza sazia?
Nun piglia suonno cchiù... Ll’hanno avvilito.
Penza: Ma è stato terno, o ‘na disgrazia ?...
Giovanni Capurro
|
| | |
