Pulcinella291 |
|
| A 'mpustarella di Maria Luisa D'Aquino
Aggio perduto pure l’appetito
‘a che sto ccà, ma ‘e ‘na manera tale,
ca penzo, st’aria mme faciarrà male,
o pure ccà cucinano sciapito!...
‘Sta cucina nun è napulitana,
niente rraù cu ‘e maccarune ‘e zita;
‘e stesse cose ‘na semmana sana,
e maie niscuna cosa sapurita!
Ma stammatina voglio fà ‘na cosa.
Me voglio arapì ‘o stomaco, ‘nu poco;
nun voglio manco ca s’appiccia ‘o ffuoco:
m’aggia magnà ‘na cosa sfezziosa…
Mme voglio fa ‘na bella ‘mpustarella
cu pane e supressata sulamente,
comm’a chella matina allera e bella
ca ‘o sole ce pareva cchiù lucente
pecché ‘o tenèvamo, int”o core nuje…
E trasenno dint’a ‘na tavernella
tu diciste: - Patrò, ‘na ‘mpustarella!
Una surtanto abbasta a tutt”e dduje! ...-
|
| |