|
|
|
Fa juorno e pe le strate
portano le carrozze da fore a le remesse,
le banche d’acquaiuole, pe’ fa li barricate...
Le ccase so’ na mutria ; li purtone so’ ‘nchiuse;
na cumpagnia cummanna de Guardia Naziunale,
vicino a Santa Briggeta, don Michele Viscuse...
- Ll’uommene in riga! All’arme! Vene lu generale
a spezionà lu posto. - Vide nu curre curre;
ma so rummase sule
tre gatte e li tammurre,
e de la forza armata
li cchiù futtute ‘ncule
hanno pigliato l’uoseme, e se la so’ sfilata.
- E chisti cca so ll’uommene? - dice lu generale.
- Neh! don Michele? - Ll ‘uommene
se ne so’ ghiute ‘e presse! -
risponne don Michele - chisti cca songo e’ fesse!
Marchese di Caccavone
|
| | |
