| 1° – Nun aizate il volume della radiolella, quanno facite ‘e servizzie cu ‘a porta aperta: una capa tenimmo e nun ‘a vulessemo essere rotta…
2° –Nun sunate ‘o clacsòn, né alluccate comme a ppazze pe chiammà ‘amice e pariente ca stanno all’urdemu piano: me pare ca, a ffrisco a ffrisco, ànno ‘nventato ‘e citofone e si nun funzionano, ‘o stesso nun avite alluccà: spezzateve ‘e gamme e saglite a chiammarle ‘a vicino, pure si ‘o tramme a mmuro è guasto e ve ll’avite ‘a fà a ppede!
3° – Nun spannite ‘e panne da ‘e balcune o da ‘e feneste d’ ’affacciata esterna o si no pare ch’è sempe festa nazzionale e avimmo esposte ‘e bannere! Spannitele invece dint’ ô curtile, ma primma spremmìtele bbuone si no facimmo ‘o lavarone dint’ ô palazzo e po’ chi passa se ‘nfonne ‘e scarpe e va zaccherianno tuorno tuorno pe tutto ‘o casamento e io nce vaco pe sotto e m’aggi’’a fà ‘nu mazzo tanto pe pulezzà…
4° –È severamente vietato il lancio d’’e sacchette d’’a mmunnezza dai balconi o da ‘e feneste: infatti succede sempe ca nun ce riuscite a centrarlo ‘o cassunetto, e ‘o sacchetto puntualmente se schiatta ‘nterra, spatrianno tutt’’a mmunnezza e ‘a strata che ggià è ‘na bbella fetenzia , addiventa ‘na latrina completa!
5° – Nun arracquate ‘e tteste ca tenite for’ô balcone cu ettolitri e ettolitri d’acqua, ca chi passa ‘a sotto se penza ca è venuto n’atu delluvio univerzale e chi pava ‘e peracotte è ‘a signora d’’o primmo piano ca se trova sempe ‘e panne stise ‘mpurpate ‘a ll’acqua d’’e ssignore d’’e piane ‘e coppa!, ma nun riesce maje a sapé cu certezza chi è ca ce ll’à ‘nfuse!
6° –Nun azzeccate chelli ccazze ‘e gomme mazzicande dinto a ll’ascenzore e ciovè ‘o tramme a mmuro, pe ve fa capí a vvuje, ca p’’e levà ce vo’ ‘a mano ‘e Ddio e nun sempe ce se riesce… e chiú d’uno s’è venuto a lamentà cu mmico ca s’è ‘nguaiato ‘o vestito, comme si foss’io ca jesse azzeccanno ‘e gomme e no quacche figlio ‘e coperativa ca, si ‘o ‘ncoccio, ‘o faccio fà mmarenna a sarachielle!
7° –È vietato scotoliare mesale, tappete e tappetielle for’ â fenesta o for’ô balcone pecché mmunnezza e fetenzia assortite jèsceno da ‘e ccase voste e, aiutate da ‘o viento, tràsono dint’ê noste…
8°–Nun parchiggiate biciclette e muturine dint’ a ll’androne; ggià ‘o ffanno tutte quante, ma ll’androne nun è ‘nu garagge e quacche vvota ‘e chesta v’’e ffaccio truvà parchiggiate dint’ ô cassunetto d’’a mmunezza e vedimmo si ve levo ‘o vizzio!
9° –Nun ve riducite all’urdemo mumento pe fa scennere ‘o cane a ffà chello ca à dda fà, pecché si ‘a povera bestia nun riesce a trattenerse e ‘e ffà annante ô purtone d’’o palazzo, chille ca passano ce vanno a ferní cu ‘e piede dinto e si succede a mme ‘na cosa ‘e chesta ce pigliammo collera ‘e brutto e a isso ‘o piglio a cauce ‘mmocca e a vvuje ve faccio ferní ‘e fa ‘e ssignore ‘e quatti quarte cu ‘o cane ‘e razza e cu ‘o guinzaglio firmato!
10° – Nun scassate ‘e ccascette d’’a posta pe ve ‘ntricà d’’e fatte ‘e ll’ate: nun so’ cacchie vuoste! E si a vvuje nisciuno ve scrive, futtiteve, ma lassate stà ‘mpace e cascette ‘e ll’ate! E stateve pure accorte, quanno acalate ‘o panaro, a nun sciaccà a nisciuno, si no ‘o prossimo ca se vene a lamentà v’’o manno â via ‘e coppa e v’’a chiagnite cu isso e io nun v’accumpagno ô spitale!
Tanto vi dovevo… e cu bbona salute!
|
