Continuazione di Ferdinando dopo la poesia O Pallone.....
'O guardaporta
Io trasette pe' na porta
de cristallo affaccettato,
e vutanno l'uocchie attuomo
rummanette affatturato !
Che lustrore! Che grannezze !
Che culore! E quante cose!
Ncoppa, sotto, a dritta, a manca,
giglie d'oro e fronne 'e rose...
Tuorno tuorno all'aria vanno
'e cculonne argiento e oro.
'E cristalle d' 'e ffeneste
so' 'e brillante... Che tesoro!
- Ferdinà, nce si' ttrasuto?
- me dicette 'o Pat'Eterno -
e si' 'o primmo da ch'è munno'
'E pigliato chisto terno !
Ecco l'atrio 'e tut t' 'e sante!
Passa nnanza, cumpariè!
Ma ched'è? Te si' ncantato?
Viene sempre appriesse a me!
'A vutata 'e na culonna
veca a uno cu na chiave...
- E' San Pietro?. - 'E nduvinato!
'O talento 'o tiene! Brave! -
'O chiammai: - Piè, vide a chiste!
- Pat'Etè, nun so' cecato...
- Embè, puortalo giranno
ca chist'è n'alletterato!
Io sto stracquo e me ne vaco,
pe' me fa' mez'ora 'e suonno!
Nun fiscà cu 'o portavoce,
pecché dormo e nun risponno !
- Portavoce? dicett'io;
e 'o telefono, San Piè?
- Nuie ccà stammo ancora arreto,
figlio mio, che vuo sapè !
Nuie mancammo 'e tanta cose!
Nuie marciammo all'uso antico. ..
Manco 'o gasso è mmiso ancora!
Siente e vide che te dico!
Ncunfidenza, si nun fosse
pe' sti qquatto stelletelle,
uno ccà sarria suggetto
d'appicciarse 'e llanternelle!
Quanta vote aggio alluccato:
"chisto è seculo ' e prugresso !
Si facessemo quaccosa?"
Nonzignore! sempe 'o stesso!
Sempe ll'angele cu 'e scelle,
senza cuorpe. e senza niente!
Sempe 'e nnùvole, e stu ncienzo
ca nce dà chisti fumiente!
Aggio fatto nu prugetto
pe' nu muorzo 'e gallaria...
Nun ce songo riuscito...
Stamme arreto, gioia mia!
Vuie vevite acqua 'e Serino?
Ll'acqua nosta è salimasta!
Vuie tenite 'e trammuasse?
Ccà nu scuorteco nce abbasta!
Vuie tenite l'arduomôbbile,
'a carorzza che va sola?
E te cride ca 'o ppuô dicere?
Seh, stai lustro! E' na parola!
Vuie tenite 'o velucicolo?
Ccà vai pede-catapede !
Nun so' ccose ca te scôcciano?
Si se conta, nun se crede!
Si tu pienze meza cosa,
nonzignore, nonzignore!
Ma sa' quante sagliariano
si mettesse l'ascensore?
Embè niente! Nun è cosa!
Chestu ccà nun 'o vvo' fa'!
Si si' lieggio e mena viento,
sulo tanno puô sperà!
Penzai pure a nu triato
pe' nce fa' cantà a Gajarre...
Nun putette spuntà niente!
Po' se dice c'uno sgarre!
Songo stato amico Suio
da guaglione, e che vo' di'?
Nun so' manco cavaliere!
Vide mo c'aggia suffri!
Ogne ghiuorno, core mio,
po' aggia fa' nu tiritosto,
cu sta gente che m'arriva!
Che te pare? E' buono 'o posto?
Purtinaro! 'E ditto niente!
Tengo ancora 'o manto russo,
chesta chiave dint' 'e scianche
e sta barba sott' 'o musso!
E na vrenzola 'e livrera?
Chi t' 'o ddà! Faceva nguacchio,
si me deva 'o pumo 'attone
e 'o capiello c' 'o pennacchio!
Che te pare? Aggio raggione?
Siente appriesso: lucre, niente!
Ccà nun pavano campagna,
songo 'a scumma d' 'e pezziente!
Nc'è San Giorgio, ch'è nu zero,
e ogne sera mprufumato,
allustrato e arricamato
va facenno 'o nnammurato;
embè cride ca turnanno
mette mana a' sacca e dà?
Trase, ride, e po' me dice:
- miette a ccunto, purtinà!
Nce sta Santo Raffaele
ca prutegge ' e ppiccerelle,
e va sempre trafecanno
cu na chiorma 'e sfacciatelle;
embè, cride ca na vota
te facesse na crianza?
Bello mio, so' cacciuttielle,
ca m'abbaiano 'int' 'a panza!
E' na vita ca, te dico,
'o cchiù santo 'e tut t' 'e sante
primma 'e farla pe' mez'ora
se mettesse a fa' 'o brigante!
Trase a chisto, caccia a chillo,
mparulèate cu chill'ato,
chiamma 'appello ogne matina...
IO, te ggiuro, sto malato!
Quant'è cara 'a vista 'e il'uocchie,
sto malato! E' nu murl
E pe' ghionta, Isso s'addorme...
e aggia fa' tuttecos' i' !
Sant'Antonio
Accussi chiacchiarianno
nui ggiràvamo p' 'o cielo.
-Tutto chesto ca te dico , sta sicuro,
ch'è Vangelo!
Viene 'a ccà, scinne sti ggrade,
jammoncenne int' 'o ciardino;
nce assettammo sott' 'o ffrisco...
Vuo nu miezo litro 'e vino?
Va dicenno, te piacesse
cchiù na presa 'e marzaletta?
Nfaccia a chesto, stammo bbuone!
Ccà nc'è robba ca se ietta!
Io, c'acalo sempe 'a capa
nnanza 'a rrobba pe' mangià,
rispunnette: -' A marennella
me garbizza, santo Pà!
Bravo mo! Accussi te voglio!
E, franchezza pe' franchezza,
si m'aspiette tre minute
me farai na gentilezza;
viene, assèttate nu poco,
ch 'io mo torno, saglio e scengo;
pe' ttramente ca t' 'o ddico
corro ncoppa, vaco e vengo!
E me rummanette sulo
miezo 'e ffresche, sot t' 'e mmura.
Io, ntramente me guardavo
'a bellezza d' 'a verdura,
sento, arreto a cierti ffrasche
poche passe nnanza a me,
nu remmore. M'avutaie
chiano chiano, pe' vedè.
Nu purciello chiatto chiatto,
mbruscenannose, veneva,
e cchiù appriesso nu Rumito
s' 'o guardava e s' 'a redeva.
Era 'o puorco 'e chillo Santo
ca se chiamma Sant'Antonio,
che facette magnà a mmorze
'e ddenocchie d' 'o demmonio.
Me susette, e c' 'o cappiello
lle facette nu saluto.
'O Rumito me guardaie;
po' dicette: -' A do' si' asciuto?
Comm' 'e fatto stu penziero?
Figliu mio, va, tornatenne!
Trova a n'angelo, e dincello
ca te mpresta quatto penne...
-Sant' Anto', ma i' so' venuto
pe' vedè no pe' restà!
Quanno moro, arrassusia,
me vedite 'e riturnà...
-E sperammo ca stu juorno
fosse propeto luntano!
Nui ccà ncoppa nce seccammo
de restà cu 'e mmano mmano!
Si sapisse, amico caro,
comme stammo affiatate! ...
Vai pe' di' meza parola,
e so' ciento scuppettate!
E' na vernia! Chillo ngrogna,
chillo arraglia, chillo abbofia,
chi buttizza, chi mmezzèa,
chi te mbroglia e chi te scofia!
Po'... Na mmidia, na schiattiglia,
ch'è na cosa da crepà!
Ccà so' tutte cape allerte!
Vonno tutte cummannà!
Santa Chiara mena zeppe
contro Santa Catarina!
Sant' Agnese furfecèa,
Santa Rosa se stingina;
Santu Onàzzio 'o giesuvito,
nun t' 'o puozze mai sunnà!
Nun par là de Santu Vito,
pecché chillo... fa abballà!
Cosicché... ccà è tale e quale
comme abbascio?… - dicett'io.
-Tiene sale int' 'a cucozza!
Tiene e quale, figlio mio !
Che te cride ca sultanto
ncoppa 'a terra addô stai tu
se cumbinano sti ccose?
Uh Giesù, Giesù, Giesù!
Tu mo sai ca tengo 'o puorco,
se po' di' da che sso' nnato?
embè, siente, si me cride:
nun avevano tentato
de luvarme l'animale?
Neh, ched'è? Ca deva mpicce!
S'avutaie Santo Nicola:
-Va, facimmone sacicce!
Llà fui tutto Santo Rocco,
ca pecchè nun tene 'o cane,
va adderitto add' 'o Signore
pe' Ile fa' tuccà cu 'e mmane .
l'ingiustizia ca nce steva!
Pecché 'o puorco e 'o cano no?
Ma si 'o cane s'arraggiava?
Aggio tuorto, neh, guaglio?
Siente appriesso! ' A preferenza,
tuttaquanta! (chesto è forte!)
l 'ha da avè Santa Cicilia
pecché sona ' o pianefforte !
Te figure, int' 'a cuntrora,
quanno 'e sante vicchiarielle
se vurriano, a nomme 'e Dio,
fa' nu muorzo 'e sunnariello?
Proprio tanno, chelIa pazza
accummencia a zulfiggià
cu 'a puntella 'e Traviata,
cu 'o murzilio 'e Ruy-Blà!
Pe' ttramente po' te cride
ch'ha fernuto, che robb'è?
Bu-bu-bu!... tta-tta!... T'accide
cu nu vàlzero ' e Sciopè !
Tu vai ncopp'add' 'o Signore?
Nce l'avise? E chelia peggio!...
E' figliola, àve raggione,
tene 'o ggenio, 'o core lieggio,
a la fine a chi fa male?
Accussi se po' spassà. .."
E va bbuone, votta lloco!
Vo' sunà? Falla sunà!
Meno male, frate mio,
ca fernesce 'o scassa-scassa
pecché ncopp' 'o pianefforte
mo ce metteno na tassa!
Jammo appriesso: Sant'Ivone,
prutettore d' 'e pagliette?
Uh fratiello mio carnale,
che mbruglione! Ma, a ppanette!
Sempe mmiezo, affaccennato,
se ntrumette e parla sempe!
Pe' te fa' nu pasticciotto
nun te lassa manco 'o tiempe
ca tu dice: Avummaria !
T'ha parlato? e t'ha mbrugliato!
Uh, che naso muscariello!
E se sape! E' n'avvucato! .
Chesto è niente! San Clemente
è geluso 'e San Pascale,
Sant'Eliggio è nu canzirro,
Sant'Emilio è n'animale...
-Chiano chiano! dicett'io,
vui che càncaro accucchiate !
Site sante tuttequante,
e sti fforme ve tirate? !
-Chesti fforme? Peggio ancora!
Ccà se tratta 'e menà 'e mmane!
E si no, sciascione mio ,
è na vita manco 'e cane!
A Madonna, sultant'Essa,
va e se mette contra 'a legge!
Essa sola è bona 'e core,
te dà luce e te prutegge! !
Tutt' 'e ggrazie ca lle cirche
t' 'e fa tutte e 11'aute ancora!
Essa sola è cumm' 'o sole,
te rischiara e t'accalora!
Dice buono 'o ditto 'e vascio,
quando parla della donna!
Una bona, nce ne steva,
e 'a facetteno Madonna!
L'auto riesto, caro mio,
ne puo fa' nu bello fascio!
Quann'è doppo, o l'abbruciammo,
o 'e mmenammo 'a copp'abbascio!...
Si sapisse ' e fattarielle
ca succedono! 'E ppalate !
Comme va ca Santo Pietro
nun ancora t'ha cuntate?
-Chillo nun ha avuto tiempo,
ma si torna, l'aggia di'
ca dicesse quacche cosa. ..
-Mo, si aspiette, accummenc'i'!
E Fattarielle
S' assettaie vicino 'o puorco,
e già steve accummincianno,
quanno arriva 'o Guardaporta
cu' 'a marenna int' a nu panno.
- Vino, pane, 'a fellatella...
Serve pe' spuzzulià...
E vedenno à Sant' Antonio:
- Guè, Toto' !... Tu pure ccà ?
- Sto' cuntanno a stu signore
quacche fatto d' 'o paese...
Viene, assettete tu pure,
jammoncenne! A grand' imprese
E accussi', na vota ognuno,
sbacantanno 'e bicchierielle,
tra nu surzo e na resata
me cuntaino 'e fattarielle.
San Crispino
San Crispino 'o ntussecuso
tu già sai ca fa 'o scarparo!
E' nu piezzo 'artigliaria
ca nun c'è chi le sta a paro!
Ogne ghiuorno fa na storia
mo pe' chesto e mo pe' chello,
e, nfuscato, afferra 'a suglia,
'o bisecolo, 'o martiello...
Na matina, 'o Pat'Eterno
le mannai, pe' 'e ffa' accuncià,
na pareglia 'e meze-cape.
Corre n'angiulo, e lle fa:
- San Crispì, dice 'o Signore
ca lle miette 'e mmeze-sòle !
Vo' na cosa acconcia acconcia...
Ma che songo, sti pparole?
Saie ca parle cu n'artista
e nun già cu nu schiappino?
Ma comm'è, te si' scurdato ,
ca me chiammo San Crispino?
Posa 'e scarpe e va vattenne,
pecché, 'o riesto nce penz'io
- No, serveva pe' te dicere
ca sti scarpe songo 'e Dio...
-N'ata vota mo! Vattenne,
ca t'avvio na forma appriesso!
Siano 'e scarpe 'e chi se sia,
ca pe' me so' tutt' 'o stesso!
Doppo n'ora l'angiulillo
torna tutto appaurato.
- Viene 'a ccà, pòrtale 'e scarpe!
Tanto 'e pressa t'ha mannato?
E dincelle: - Vo' tre lire!
Ve l 'ha fatto quase nove !
Nce ha mettute 'e guardiuncielle,
'e ppuntette, tacche e chiuove!
L 'angiulillo, aizanno vuolo,
va addu Dio. -Quante ne vo'?
- Vo' tre lire... - Ma ch'è pazzo?
- Che ne saccio, neh Signò?
Chillo sta accussi arraggiato!
N'ato ppoco me magnava! ...
Si ll'avisseve sentuto
comme ddiece jastemmava!
- Lassa sta'! Mo nce vach'io...
E scennette. - San Crispi?
- Gnò! - Ched'è sta jacuvella?
Sti denare 'e vvuò accussì? ...
- Accussì? Mannaggia 'a morte!
Vi' che capa gluriosa!...
O pavate, o, n'ata vota,
mo ve scoso tuttecosa!
Tu capisce? lo nun t' 'o spieco!
Cammurristo, chistu ccà!
N' 'a fa bona manco a Dio!
Miette a bbevere, paisà!
