|
|
| 
Tu si’ na santa, e i’ songo nu malato,
comm’a li ssante staie ncopp’a n’altare,
i’, pe’ pregarte, stongo addenucchiato:
– Oi’ santarella mia, famme sanare!
Damme la medicina prezziosa
che tiene dint’a ll’uocchie celestine,
dint’a sta vocca che t’addora ’e rosa,
e dint’a sti capille fine fine.
Addenucchiato, io nun me movo, e spero:
songo nu peccatore, e chesto è ovvero,
ma, giacché si’ na santa overamente,
famme sta grazzia: nun te costa niente.
I’mo scuntà vulesse ogne peccato
facenno vuto, oi’ santarella mia,
da starme tutt’ ’a vita ccà nchiuvato,
si tu sanasse chesta malatia.
De juorno, io stesse nnanze a st’uocchie rare,
dicenno avummarie e gloriapate;
de notte, tu scennisse dall’altare
p’addimannarme: – E’ fatte cchiù peccate?
Tenesse allora na risposta pronta:
peccato de penziero nun se conta:
si vuo’ ca me cunfesso overamente,
peccammo nzieme: nun te costa niente.
Nfra sti cannele che te stanno attuorno,
nun ne vide una assaie cchiù cunzumata?
nun ne siente una, dì, ch’è nu taluorno,
ca chiagne sempe da che s’è allumata?
Oi’ santarè, chella cannela è ’a mia:
n’allummo una ’a matina e n’ata ’a sera,
e ddiece e vinte te n’allummaria
si tu stisse a sentì chesta preghiera:
Succurre stu malato peccatore:
peccate e malattia chiammale “ammore”;
e, giacché si na santa overamente,
famme sta grazzia: nun te costa niente.
|
| | |
