|
|
|  Se vonno bbene ê ffiglie: è naturale..
lloro so’ ‘o sanghe tujo..ll’ hê generato.
Tu si’ sicuro ca 'nu bbene eguale
nn’ ’o putarraje pruvà pe' nisciun’ ato.
‘E chesto si’ cunvinto 'nzino a quanno
'nu figlio tujo nun addeventa pate:
'nu bene ‘e 'n’ ata specie ma cchiù granne
t’ ’o portano ‘e nepute appena nate.
‘O bbene p’ ’e nepute è 'n’ ata cosa :
quanno ll’ hê canusciuto, ll’ hê capito.
'Sti criaturelle, 'sti bucciuole ‘e rosa
a tte fanno turnà ‘a gioja d’ ’a vita.
Appena so’ 'nu poco strappatielle,
t’ ’e puorte tuorno, tuorno a ppassiggià;
‘e mmiette ‘nmostra comm’a 'nu cartiello,
mo vuò ca tutt’ ’o munno ha dda guardà.
Chella pacienzia ca tu maje hê tenuto,
’a truove comm’ a nniente, all’ impruvviso.
Si’ addeventato schiavo d’ ’e nepute,
tutto si’ pronto a ffà pe' 'nu surriso.
'Stu bbene nun è bene, è divuzione
e si ce pienze: chesta è ‘a spiecazione.
Tu staje recuperanno cu ‘e nepute
‘o tiempo ca ,p’ ’e figlie, nun hê avuto !
di Antonio Gagliardi Edited by Pulcinella291 - 15/11/2019, 09:16 |
| | |
