Dint' 'o vico 'e Scassacocchie, don Pascale 'o cusetore tene 'e ccorne p' 'e mal'uocchie. E, ndennimmoce a duvere, don Pascale è n'ommo 'e core, e te sape fà o mestiere! Comme cose! È nu spaviento! Comme taglia! È na bellezza! Taglia dinto a nu mumento! 'A mugliera ca 'o vo' bene propet’essa nce l’ha mise chelli ccorne. Isso s' 'e ttene! E se sape! Tanta gente te vo' male a cchisto munno! Nun te fanno arrigna niente! Ammacaro, cu sti ccorne appennute sott’ ’a porta, schiatta 'a mmiria e schiatta 'a morta! 'I che ssà! Quann’ ’a fatica fa campà nu lavurante, l'hanno 'nganna tuttuquante! Chella 'a moglia 'e don Pascale, chella llà, mo nce vo' 'o fatto, è na ronna ca va assaie! 'O cunziglia, 'o fa fa' chiatto, l'ha luvato. 'a dint' 'e guaie, si vo' tre, lle porta quatto, l'accarezza, s' 'o cuverna, tira accunte 'o macazzino, lle vo' sta' sempe vicino... Nzomma, chella è nu tesoro! Don Pascale c' 'o ccapisce va dicenno ch’essa è d’oro. Schiatta a mmiria! Se fatica! Chi fa ll'arte 'e Micalasse che se magna, turze 'e spica? Accussi se faticasse ogge e sempe! 'A ggente parla? Che nce mporta a nuie? Schiattasse! Tutte ll'uocchie ncuollo a lloro, e pecché? Pecché Pascale nun le manca mai lavoro! Cca nisciune, già se ndenne, po' fa' sempe 'e fatte suoie! Neh, sta ggente che pretenne? Don Pascale magna 'e ddoie? Ma magnammo, eccoce cca! E nun tutte 'o pponno fa'! E 'a megli'ora! Po' se n'esce, pecché 'a vista (chillo cóse) faticanno nce patesce! Vene 'o ggiovane? Ma chillo apparecchia e fa pertose, chillo povero Ciccillo! 'A mugliera 'e don Pascale 'o putregge e 'o vede bbene? E gnorsì Che nc'è de male? Chillo tene n'arta 'e mmane! Po' se mena 'e capa sotto e gguaragna 'e ssettimane! Vuie lle date nu cappotto? Chillo fa cinco pertose cuntann'uno anfino a otto! E stat'isso, propet'isso, che ll'ha dato stu cunziglio! Chillo llà è nu buono figlio! Sa' ch'ha ditto? «'Onna Carmè, appennimmo na pareglia e faciteme fa' a mme! Ammacaro, cu sti ccorne appennute mmocc' 'a porta, schiatta 'a mmiria e schiatta 'a morta!