|
|
| E' trasuta e s'è stennuta
ncopp' 'o fierro d' 'a ringhiera
d' 'o balcone;
e c' 'o naso nfacci' 'e llastre
po' c' 'a fronte
e po' c' 'a faccia
se smerzava
se girava
s'avutava 'a ccà e 'a llà
pe' da' n'uocchio dint' 'a casa.
Ll'aggio vista,
aggio araputo:
"Finalmente si' turnata!
Trase, trase! "
Essa è trasuta.
S'è menata
longa longa p' 'e riggiole,
s'è mpezzata
sott' 'e pporte
'e ll`ati stanze,
senghe senghe s'è mpezzata.
Che t'ha fatto nfacci"e mure,
che friscura c' 'a purtato
tuorno tuorno
for' 'a loggia
mmiez' 'e ppiante!
A migliare
ll'uocchie 'e luce
'a miez' 'e ffronne
se menaveno pe' terra.
Nun er' essa?
No? E chi era?
Nun er' essa...
E che, so' scemo?
Io me sento n'atu ttanto
quanno trase primmavera!
E' trasuta - Eduardo De Filippo.
Edited by Pulcinella291 - 21/3/2014, 13:17
|
| | |
