|
|
|
(primma 'e s'aizà 'o telone)
—Musicaaa!... Musicaaa!...—Ciccì, salute! —Salutammo!—Sunate, prufessò! Prufessò, prufessò!... site nzurdute? —Nuie 'e ppavammo, sti ri' sorde, o no?
—Tu guarda sti tre viecchie nzallanute! —Tuoste e rusecarielle! —Guè, Tatò! Nu sordo 'e franfellicche... E ccu salute! 'O cappelluccio nuovo, zi-Nicò?
—Musicaa...! —Nuie vulimmo 'Un t'o fa fa! —Nonzignore, Ciccì! Basta ca po'! —Vulite, o nun vulite accummincià?
—Ri' cientèseme! È doce, 'a paparella! —Ah, bene!.,. bene!... Bravo, prufessò! Chesta canzone è overamente bella!
II.
—Bisse, bisse!—Vulimmo 'a Bbeatrice! 'A serenata int' 'o Buccaccio! Se'! —Gnorsì! Pe tte mme so' fatto n'alice! 'A vulimmo! Sunate, scorze è zè! ¹)
—Sti figli 'e porca! Don Gennà, che ddice, 'a sunammo?...—Vattenne! Ma cherè! ²) Lass' 'e ccantà!...—Salute a chist'amice! —Bonanotta!...—Acccurdate, don Viciè!
—Chiòvano torze 'a copp' 'a picciunara! Don Gennà! Ma si' ttuosto? E jammo bello! Cuntentammo a sti figlie de janara!
—Ah! Mo' 'iza 'o telone Pascariello... Meglio accussì!...
—«Meschino!... Sol nel bosco,
di nottetempo... con quest'aere fosco...!»
III.
—Chisto chi è?—Nu turco, nun 'o vire? —Grazioscèllenza! 'O ssaccio; ma chi è? —'I quant' è brutto!...—Zitto!—'I quant' è nire! —È nu mago?—Gniernò!—Se po' sapè?
—«O buon Macon! Ora che far? che dire? La buona via perdei... eh, eh, eh, eh!...» —Curiuso!—Guè, chisto chiagne e rire! —Guè, primma se lamenta e po'... cherè?
—Chillo 'a canosce, 'a strata! Vo' fa fenta! Nun te n'adduone ch'è nu traritore! —Che brutta razza! Quant'è malamenta!
—Mo' t' 'o scinne, se', se'!...
—«Oh sul mio core!
Sul mio Macon! Da l'ime fondamenta vo' far crollare il tempio del Signore!»
IV.
(Alizannose tuttuquante e alluccanno)
—E te nne vaie o no! Isso faceva... Che ffacive? Sta zoccola 'e samente! ¹) —C'ha ritto? Ma che ssa', che Dio vuleva! —Fancillo, nu pernacchio, pe ttramente!
—N' 'o vulimmo!—Vattenne!—Che diceva? —Macone è il mio signor vero e potente! —Cacciatennillo a chisto!—Mo' 'o cuglieva 'a scorza 'e pigna! Uh Dio, guè, tiene mente!
—Sciù...—Vattenne!...—Na preta...! Peccerì! cioncate ²), 'a lloco ncoppa! Nun menate! Vuije l'arapite, 'a capa, a quaccheruno!
—Mannatennillo!...—Ma n' 'o facit' i'? —Puorco!—Ca nuie v' 'o rumpimmo, 'o triato! Nun ne vulimmo sentì cchiù nisciuno!
|
| |