|
|
| 'A maschera
Nce sta chi aspetta carnevale pe se mascherà,
chi se mette sempe 'a maschera pe ccampà.
Nce sta chi 'a porta spisso p'attirà l'attenzione
e cchi s' 'a mette a ssiconda d' 'a situazione.
Nun ll'ausammo sulamente quann'è ffesta:
'a porta 'o ricco, 'o povero e 'a ggent'onesta.
S' 'a mette chi hadda mustrà nu certo decoro:
p'apparà nu purtuso cu na pezza a cculore.
È spisso bbusciarda, ma nun 'o ffà apposta...
'a purtammo tutt'e juorne: e 'a faccia nosta.
Giovanna Balsamo
|
| | |
