‘A parentela è comm’a na cevetta
sente ‘a puzza d’’o muorto e s’avvicina :
se piazza faccia e fronte d’’a matina
e si nun vede ‘a Naso ‘e cane, aspetta
.
Po sente ‘o strillo e tanno s’arricetta
cu ‘a vesta nera, ‘e llacreme, ammuina.
Chi abbada ô carro i ê sciure, chi cucina
e chi appripara ll’urdema tuletta.
.
‘A vedova ca chiagne cu ‘e guagliune
e lloro a cunfurtarla ma..adduranno
ca nn’ hanno avuto niente, ‘e carugnune,
.
a uno a uno ma….senza salutà…,
s’’a squagliano p’’e ggrare rusecanno.
‘O sutterrano primma ‘e ..s’’o purtà !
