|
|
| Mo si p’’a strata ‘ncontro na figliola, ma una ‘e chelli llà cchiù sapurite, ca songo, pe ll’addore e p’’o sapore, comm’e ppercoche dint’a ll’acquavite, ** me fermo, ‘a tengo mente e..’o core mio, ca ‘mpietto me fa sempe ll’angarella e giovane è rimasto, se risente e dice :Tuorto nun tiene, overo è bella. ** E si ne passa n’ata e n’ata ancora, i’ e chistu core lle stennimmo ‘e bbraccia.. Però, ce ne stesse una ‘e sti ffigliole ca me guardasse meza vota ‘nfaccia. ** Ma comme va ? Pecchè me fanno chesto ? Erano primma tantu cundiscendente : bastava na guardata, na smestuta p’’e fà menà suspire ‘e fuoco ardente.. ** E nun ve dico niente si lle ghievo nu poco appriesso. Era na frennesia. Redevano allampate ‘e cuntentezza.. fermate e fermatelle ‘e simpatia, ** reselle, surdigline, canzuncelle.. e si nun me spicciavo a m’accustà, s’accustavano lloro cu na scusa e subbèto attaccavano a parlà. ** E mo ? Ma, scuse : mmirete nu poco ‘int’’a vetrina ‘e sta pasticciaria e dimme si può essere guardato da ‘e ffemmene ca ‘ncuntre ‘miez’’a via. ** Tiene n’età : si’ sette vvote nonno ; si’ addeventate già comm’a nu straccio ; truove n’amico e appena ca s’accosta, subbeto te ce appienne sott’’o vraccio.. ** Che vaje truvanno cchiù, tu e chistu core ? Statte ‘int’’a casa, pigliate ‘o dicotto.. curate ‘a tosse, ‘o ppoco ‘e sopraffiato.. e arravogliate buono ‘int’’o cappotto !!
|
| |