|
|
| 
Chella ca se sciglieva a primmavera
‘e ccerase cugliute a ddoje a ddoje,
pecchè sultanto chelle erano ‘e ssoje
e ‘a facevano sta’ cuntenta e allera:
chella ca mme parette ‘a chiù sincera,
e mme vasava e nun cercava gioje
-ma s’ ’e ffaceva cu ‘e ccerase soje-
mo nun ‘o ssaccio anduvinà chi era.
se faceva sciucquaglie e sciucquaglielle
cu ‘e ccerase sciugliute alleramente:
‘e chiù grosse, ‘e mmezzane, ‘e ppiccerelle.
E i’ mme ricordo, quanno abbrile trase,
dduje uocchie belle, chiare e stralucente,
e dduje sciucquaglie fatte cu ‘e ccerase.
Chi era? Era ‘a cchiù bella, ‘a cchiù gentile,
cu na faccella doce ‘e na madonna
ca, si fa ‘o pizzo a riso, ‘o core aonna:
pecchesto m’ ‘a ricordo dint’ Abbrile.
E mm’ ‘a ricordo dinto a nu curtile
addò ll’arbere viecchie Abbrile ‘e nfronna,
e pe’ Pasca rusata, ancora, ‘a nonna
mette ‘e rrose sfrunnate int’ ‘o vacile:
mette ‘e rrose sfrunnate pe’ fa’ ‘a faccia
chiù fresca e prufumata sott’ ‘e vase
quanno ‘o sposo alla fine se ll’abbraccia…
Core, nun fuje na nnammurata mia:
nun cercà ‘o nomme; chella d’ ‘e ccerase,
no, femmena nun è, chella è ‘a Poesia.
E.A. Mario 1928 |
| | |
