|
|
| Donna Maria s'ha miso a' vesta nova e nu paro 'e scarpine scamusciate. 'A gente attuorno diceno: - Va trova! Va trova ch'ati guaie ha cumbinate! -
Ma sta donna Maria, viata a essa, putesse fa''a nutriccia a' "Nunziata": tene ddoie spalle 'e na matre Badessa, na carnagione 'e seta 'mpusumata. , E ttene'e mmane chiene 'e fussetelle, 'o pizzo a rrisa d''a napulitana. Quanno se ferma dint''e Ffuntanelle, s''a spogliano cu ll'uocchie sana sana.
E aieressera, proprio a ' Ffuntanelle se so sparate pe' donna Maria. Cinche perzune, cinque rivultelle. Peggio 'e quanno se spara 'a batteria.
So' ghiute duie cascante a 'e Pellerine, senza sbelare il dorge oggetto amato! Tutt''e ffigliole stanno ncopp''e spine e ognuna s'annasconne 'o nnammurato.
Ma tutt''a giuventù campa 'e suspire e pe donna Maria more 'e speranze. Quanno te nchiova cu chill'uocchie nire pure nu figlio 'e Re lle cade nnanze.
E' na riggina barbara e sberressa, ca tutte 'a vonno ma nisciuno 'a prova. E sempe ca se sparano pe' essa, essa se ngigna 'e scarpe e 'a vesta nova.
- Raffaele Chiurazzi
|
| |