Sott’’o balcone di Ferdinando Russo

**

So’ venute a sunà cierti cecate
sott’’o balcone addò t’ aspetto a te.
Tutt’’e ccanzone meje t’hanno cantate,
ma nun ce stive. Ire luntana ‘a me.
**
Luntana assaje, ma chesta vota overo,
senza speranza manco ‘e nu chi sa !
Luntana ‘e core, luntana ‘e penziero,
luntana ‘e sentimento e de buntà !!
**
E pure ‘o juorno primma eramo state
stritte, vicine ; t’’o ricuorde o no ?
E me dicive ccose appassiunate
che chistu core mio scurdà nun po’ !
**
E pure ‘o juorno primma eramo jute
nzieme ‘ncampagna ! T’’o rricuorde, o che ?
E mmiezo ê vase nc’eramo perdute
e tu addurave comm’a nu buchè !!
**
Tutto è passato ! Primmavera bella,
quanno venive e me dicive si’;
quanno m’accarezzave cu ‘a manella
e me parlave comme vulev’i’ !
**
Tutto è scumparzo, tutto s’è squagliato,
tutto è distrutto e stranio pe te so’,
comm’a na fronna secca addeventato
che nun se ferma maje pecchè nun po’ !
**
E tu si’ ‘o viento, che se nfuria e passa
senza sapè che male po’ purtà,
e sbatte, e spezza, e spàstena, e scunquassa
putenno ‘a vita ‘e n’ommo arruvinà !
**
Chesto m’attocca ! Quanno tu hê sentuto
che ‘o core tujo nun lle ‘mpurtava ‘e me,
hê miso ‘o muorto dint’a nu tavuto,
ll’hê ditto ‘o rrequie e nun ‘o vuò vedè !