|
|
| Video Vi giuro, nunn'ancora aggiu capito, si cu 'sta libbertà, chistu prugresso, avimmo overamente prugredito o stammo peggio, meglio o sempe 'o stesso e si c'esiste 'sta democrazia oppure è sulamente fantasia. Io ca ricordo 'o tiempo d' 'o passato, quanno mancava chesta libbertà, nun me so' maie sentuto carcerato, mò fa paura quase 'e cammenà. I' credo, comme crede tanta ggente, 'sta libbertà s' 'a gode 'o delinquente.
E girano cu 'a macchina o 'a lambretta, (Ca stu prugresso ha dato a tutte quante) e chi purtava 'o ciuccio cu 'a carretta, pe' dimustrà ch'è 'fine' e ch'è 'galante', passanno, cu na 'mossa e cu 'n'acuto, te siente 'e da' nu titolo 'a curnuto!
Chissà si è frutto d' 'a democrazia oppure 'o ddice 'a Costituzione, l'usanza 'e ppiccìà 'o ffuoco 'nmiezo a' via pe' te fa luce a' prostituzione. Sarrà pecchè cu 'garbo e 'dignità, te fanno vede annuda... 'a 'libbertà'. Nunn è ca io rimpiango a dittatura, ma ogne ccosa bella cunquistata, l'avimmo trasfurmata a fregatura, l'avimmo malamente nterpretata. Prugresso, libbertà e democrazia, n'avimmo fatto abbuso e porcheria!
di Ugo Izzolino Edited by Pulcinella291 - 17/6/2020, 17:05
|
| |