|
|
| Passata 'a sessantina
nu prublema ogni mmatina.
Tenco 'o commodino
chino chino 'e mmedicine.
Nce sta nu poco 'e tutto;
pare na farmacia:
tenco nu rimedio
p'ogni ttipo 'e malatia.
Pe nun parlà d' 'e vvisite
ca ogni ttanto m'aggi' 'a fa':
'e miedece mme diceno
ca mm'aggi' 'a curà.
Accussì, si tenco nu dulore,
vaco subbeto addó duttore.
Appena me vede ll'ortopedico
mme dice: "cara signora,
ogni gghiuorno avit' 'a cammenà...
almeno na mezz'ora."
Vaco addó reumatologo,
mme dice: "nce sta poco 'a fa',
'a comme stanno 'e ccose...
v'avit' 'a sulo arrepusà."
Chi mme dice assettate,
chi vo' ca cammino...
chi dice c'aggi' 'a bbere assaje
pe pulezzà 'e stentine.
Chi mme dà 'e sserenghe,
chi mme dà 'e supposte.
Chi mme dice: "cu 'sta cura,
state a pposto."
Nun vaco bbona 'e cuorpo,
tenco 'o ppoco 'e stitichezza:
'o miedeco mme dà 'o pinnolo
e vvaco ca è na bbellezza.
Si tenco 'e rine astritte,
pecché faccio poca urina...
vaco da 'o ginecologo
ggià a pprimma matina.
"Sì vulite sta' bbona
vi dovete curare:
pigliateve 'sti bbustine
che vi fanno urinare."
Ê vvote mme sento na tristezza,
ati vvote stongo na bbellezza.
Ma si parlo c' 'o miedeco
'e 'sta malincunia...
subbeto mme dà 'comme cura,
'a ppisicoterapia."
Quanno po' vaco truvanno
'o miedeco p' 'a justa soluzione;
vaco addó meglio prufessore
pe rrisolvere 'a questione.
"Signora mia, 'o fatto ccà è nniro:
è inutile ca nce pigliammo ngiro.
Se veramente bene
...voi volete stare,
questa è la cura giusta
che poi dovrete fare.
Quando vi trovate
nel momento critico,
ve pigliate na pinnola
di questo spasmolitico.
Vve leva sicuramente
quacche mmale 'e panza:
erutterete assaje
e flatulerete in abbondanza.
Quanno v'avite levato
'a 'int'â panza tutta ll'aria...
vve sentite meglio:
cantate comme 'a na canaria.
Po' pe cconcludere
pigliateve ll'aspirina:
vve pigliate nu pinnolo
ogni ssera o ogni mmatina.
Mo datemi solo euro cento:
è ppoco...ma m'accontento.
A vvuje...faccio un prezzo di favore:
è ll'onorario: io sono un professore!
Però nun 'e ddate a mme,
sta 'a segretaria fore:
"dutto' grazie tante,
spero c'aggio ristoro."
"E 'a fattura nun me 'a facite?
E cche so' nu chiromante?
Se volete fatturare...
'a cifra è cchiù ppesante!"
Nzomma ccà ognuno
te vo' dà na cura:
ma quanno metto man'â sacca
m'aumentano 'e dulure!
Nzomma 'e ccure costano, sfiancano...
e i' mme songo sfastediata:
nun ne pozzo cchiù;
voglio sta' tutta scassata.
Giovanna Balsamo
|
| | |
